Sa vuqa sara na vakasama e cauraki ena noda rawata se sega ni rawata na veika vakabisinisi.
So na gauna, esa dau yaco sara me da vakatautauvatataki kei ira na wekada eso ka ra gole mai vanua tani ka ra sa maliwai keda tiko ena gauna oqo. Era vulagi mai ena noda vanua.
Ia e dua na ka me da nanuma tiko. Na vanua oqo o Viti e bulia na Kalou ka nona. O keda, eda kena ivakatawa ga. Eda a sucu ligalala ka da na lesu ligala.
So na gauna, se ena vuqa na gauna, eda raici ira na kai tani me ra sa keda meca. Ia qo, e veicalati kei na ka e tukuni ena iVola me vaka e kuna ena Malakai 2: 10 “Sa dua bau ga na tamada kecega, se sega? Sa dua bau ga na Kalou sa buli keda se segai?”
O keda kece eda buli na qele. Sa ikoya na waqa qele e a ceguva na Kalou me qai tekivu na bula ka me da veiucui kei na Kalou. Oqo na dina levu e dodonu me da tusanaka tiko ena veigauna kece.
Ena buturara vakabisinisi, e rawa ni tukuni saraga vakadodonu ni o keda ga na iTaukei eda keda meca levu taudua.
Qo e dua na kena vakaraitaki.
Dua na sasaga ni teitei e a caka ena dua na vanua ena colo kei Viti Levu. Keirau lewe rua e Viti ka keirau sema kei dua mai Queensland, Ositerelia. Na neitou sasaga e yacana vakaperetania na hydroponics se na dua na iwalewale ni teitei ka vakayagataki kina na wai.
Sa rawa na lisi ka sa tekivu na cakacaka. E a lai dolava yani na neitou sasaga na matanitu ena gauna oya. Ra tiko kina o ira na ivakalesilesi ena itagede sara e cake. Sa toso vinaka sara
O ira na itaukei ni qele era sa vulica na cakacaka. Era sa vakaitavi sara ena cakacaka ena teiteivaki e wai se hydrponics.
Ia ena ikaono ni yabaki, e a qai sogota na gaunisala o koya na turaga ena yasayasa oya. E a mani sega ni yaco rawa yani na lori ni waiwai.
Keitou rai toka sa basu na wavu.
Na kena isoqoni kecega ni sa mai vakaleqai na bisinisi ka sa mai tini. Sa tubua na vanua oya ka ra sa sega ni cakacaka o ira na itaukei ni qele.
Na gauna e cici vinaka tu kina, e a kune ena neitou teitei na capsicum, strawberries, celery kei na so tale. Na kakana kece qo e dau voli tu mai vanua tani ka vakayagataka kina na matanitu e sagavulu na milioni na dola. Keitou a tea kece tu. Ena kena gauna esa ia na tatamusuki.
Sa raica na matanitu ni na rawa kina e dua na ilavo levu. Sa yalataka sara na iliuliu ni matanitu ena gauna oya ni na vakadrodroi vei keitou na veivuke. Sa cavuti sara e dua na matani vika — $4 na milioni.
Ia keitou qai rogoca ni a qai soli na ilavo oya vua e dua tale. E sega ni lewe ni noda vanua. Sega ni dede ni oti na taura na ilavo, esa biubiu.
Qo na leqa ni iTaukei — o keda tikoga! E dua na ka au sa raica. Au sa yabaki 84 toka qo.
O keda na iTaukei, e vuqa sara vei keda eda tusanaka ni da lotu vaka-Karisito. Ia eda dau veiqati ca! Ni dua vei keda eda raica ni sa toso, eda vuvutaki koya kei na nona vuvale. E vua na ka eda cakava e veicalati sara tu ga kei na vakavuvuli ni noda lotu.
Eda sega ni lomani ira na wekada. Eda sega ni vakayacora na veika eda vinakata me vakayacori vei keda. Qo e laurai ena noda vanua ka laurai talega vei ira na noda era sa tau mai vanua tani.
O cei beka e nona itavi me tutaki na na kena yadravi na veika me baleti keda? Na bose vakoro, tikina, yasana se yaco sara ina Bose Levu Vakaturaga? E rawa beka ni ra vakaitavitaki ira ena cakacaka ni veivakatorocaketaki dina?
Eda sa lai veitalanoataka na kena volai vou e dua na Yavu ni Vakavulewa? Esa vica na noda Yavu ni Vakavulewa. Sa vica na vuaviri.
Era sa walia na noda leqa? Sega!
Eda sa qai raica ga na nodra sinaita na valeniveivesu o ira na noda. E tiko sara e cake na keda iwiliwili ni leqa kece ga ia eda veitalanoataka me vanua lotu vaka-Karisito o Viti.
E sega ni da vola ga ni sa tini bulumakau ka na veisau na lewena. Ke tini ika, ena tini ika tikoga veitalia na ivola cava eda vakabira kina.
Na levu ni duidui mata lotu esa vaka me sa vaka na caka bisinisi. Sa kalou na ilavo ka sa sega ni vakabulai na yalo.
Kevaka eda sa sega ni veiyaloni ka veilomani rawa, eda sa na vakabulai vakacava?
Me sa liutaki keda ga na Karisito. O koya qo na dina me da taqomaka.
Ni da sa vakayacora, eda sa na qai tauca na vuana.
Qo na rai nei Vuniwai Epeli Nailatikau ka sega ni nona na Na iLalakai.
