Na vuli me baleta na kila ni veika vakailavo se financial literacy esa sivita na 20 vakacaca na yabaki na kena vakayacori tiko ena noda vanua. Ra curuma na noda veikorokoro kei na kena itikotiko vakagalala ena kena qaravi na vuli me baleta na veika vakailavo.
Ia, eda rogoca, wilika ka sarava talega ena veivatavata ni vakau itukutuku ni sega soti sara tiko ni mana na noda curu yani ka vakaitavi sara ena buturara oya. Sa qai tukuni tu ni va tiko oya baleta ni sega ni noda iyau se tiki ni noda vakaitaukei na ilavo.
Sega sara ni dua vei keda e lecava ni vuqa na itukutuku, levu na italanoa, ka vakamacalataki kina na dredre eda sotava yarayara na kawa iTaukei ena sasaga ni ka vakailavo. Ia sa caka makawa tiko na vuli.
Na cava e sega soti kina ni laurai se vakilai na veisau ena noda bula vakailavo?
Sa totoka ni sa caka tiko na vuli. Na levu ga ni koro kei na itikotiko e caka kina, na kena vinaka.
Ia, e rua ga na taro.
Cava ena rawa ni caka me laurai na veisau ena vica na taba tamata? Me kua ni oti ga na itaba e ratou a vuli, sa mai oti talega vei ratou na yaga ni vuli. Na itaba tarava, sa qai waraka tale tu me qai lai qaravi tale yani vei ira na vuli.
Na kena ikarua qo. Na kena tuvai na vuli, e tiko e dua na vakanananu me yaco na veisau ena nodra itovo ni vakasama se rai o ira na lewe ni vuli?
Ni sa veisau na rai kei na vakasama, sa na laurai na veisau oqo ena itovo se draki ni bula nei dua. Qo na imatai ni tagede.
Na kena ikarua, sa ikoya ni sa dewava yani na itaba tamata tarava na veisau oqo. Ia e tekivu sara tikoga mai ena noda vakasama.
Ra sa qarava tiko na vuli ni veika vakailavo kei na noda vakaitavi ena buturara vata oya o ira na kena ivakalesilesi mai na veibaqe eso era veiqaravi tiko ena noda vanua.
Ia vakacava o keda? Eda bau veitalanoataka tu na veika oqo ena gauna eda dau sota kina vakaveiwekani?
Ia eda vakawai, vakalewai se veiwalitaki ira na wekada na Idia. Na gauna era sota kina, eda rogoca wasoma ena nodra veitalanoa na vosa na paisa (ilavo).
Da veiwalitaki ira. Ia na ilavo saraga ya koya e vakavuna na noda sa biu koro me da mai sasaga vuli me rawa na cakacaka vinaka kei na dua na itagede ni bula.
Koya qo e sega ni dua vei keda e dredrevaka. Eda vinakata kece tiko!
